CEBU, Philippines — Ang Team JKV, Samsung ug Project Hoops milansang sa ikaduha nilang sagunson nga daog sa Hoop Nation Developmental League (HNDL)-Sunday Night Hoops Season 2 nga gipaluyohan sa Sunsport didto sa City Sports Club-Cebu gym.
Si Ron Montero mikadlit og 18 puntos ug lima ka steals sa dihang gibuntog sa JKV ang Metro Ayala 1, 64-58, samtang si Peter Notarte miposa og pito ka 3-pointers sa iyang 23 puntos aron pangulohan ang Samsung ngadto sa 64-49 nga demolisyon sa Rescue Fone.
Wala sab magpaalkansi si Philmer Seno nga mikolekta og 15 puntos, upat ka assists ug lima ka steals sa dihang gitumba sa Project Hoops ang Assassin, 63-44.
Sa ubang mga resulta, ang Metro Ayala 2 nakaipsot batok sa Milestone, 55-53, ang TUF IT Park mipukan sa City Sports, 55-50, samtang ang RNK Builders nakalingkawas batok sa Spit On Them sud sa overtime, 77-75.
Si Deto JR Rodriguez maoy nangu sa Metro Ayala 2 uban ang 10 puntos, pito ka rebounds ug tulo ka assists, si John Saymon ang bida sa TUF IT Park bitbit ang 18 puntos, lima ka rebounds ug duha ka assists, samtang si Tolitz Dumangcas mipabuto ig 30 puntos, pito ka rebounds ug tulo ka blocks alang sa RNK Builders.