UV Lancers wa gihapo'y pilde

CEBU, Philippines — Si Jiesel Tarrosa mikuha og atensiyon sa dihang gi-ihaw sa University of the Visayas (UV) Green Lancers ang

University of San Jose-Recoletos (US-R) Jaguars, 86-64, aron pagpabiling way pilde sa 2022 Cebu Schools Athletic Foundation, Inc. (CESAFI) basketball season niadtong Sabado sa gabii sa Cebu Coliseum.

Mibubo si Tarrosa og 13 sa iyang 20 puntos sa first half uban ang unom ka rebounds, duha ka assists, tulo ka steals ug tulo blocks alang sa Lancers nga gipahugtan ang pagkupot sa solong liderato bitbit ang perpektong 4-0 nga marka. Sila si Tarrosa, Jim Paul Amistoso ug Froiland Maglasang maoy mga utok hinungdan nga naka-establisar ang Lancers og 49-39 nga labaw sa halftime.

Gitiwasan sa way pagbahar Lancers ang Jaguars sa katapusang kuwarter, 20-9, aron pagposte niini og 22 piuntos nga demolisyon.

Si Maglasang mitapos uban ang 11 puntos, samtang sila si Amistoso, Ivo Salarda, ug team captain Ted Saga mitampo og 10 puntos matag usa alang sa Lancers.

Sa laing aksiyon, si Paul Galinato mitagak og 10 sa iyang 18 puntos sa pinal nga kuwarter samtang si Jasper Pacana mirapido og 14 sa iyang 16 puntos sa second half sa dihang gilatigo sa University of Cebu (UC) Webmasters ang Cebu Institute of Technology-University (CIT-U) Wildcats, 78-67, aron tablahon ang ilang record ngadto sa 2-2.

Ang mga batos ni coach Kernn Sesante abante lamang og tres puntos, 52-49, apan sila si Galinato, Pacana, Michael Diaz, ug Luther Leonard nagtambayong paglusad og bagsik nga ataki sa endghame, 26-18, aron biyaan og 11 puntos ang Wildcats.

Si Galinato duna say unom ka rebounds ug unom ka assists, sila si Diaz ug Leonard nagkumboya'g 15 puntos samtang si Jhiey Paraldo mitampo og 10 puntos sa ikaduhang sagunson nga daog sa Webmasters.