MANILA, Philippines — Ang Space Jam ug Castille nakalingkawas batok sa tagsa-tagsa nila ka mga karibal sa duha ka kulbahinam nga aksiyon sa Sunday Night Hoops didto sa City Sports Club-Cebu gym.
Nag-agi usa og overtime ang Space Jam sa wala pa pioga ang Brazzers, 76-72, samtang ang Castille nanginahanglan pa sab og dugang singko minutos sa wala buntoga ang kanhi way pildeng Parokya Ni Edgar, 86-85.Si TJ Villacampa mihipos og nuybe puntos, 12 ka rebounds ug duha ka blocks alang sa Space Jam, nga mitali sa ikaduha pa lamang nila nga daog sud sa lima ka duwa.
Sa laing bahin, si Jhon Flores mitimbre og 23 puntos, lima ka rebounds ug lima ka assists sa Castille nga miinat sa ilang record ngadto sa 3-2.
Mihimo sab og kasikas si Arnel Azarcon uban ang 12 puntos, duha ka rebounds ug lima ka assists sa dihang gipukan sa CP Construction ang Spit On Them, 45-35, aron pakgangon ang duha ka sagunson nilang pilde.
Sa ubang resulta, si Jherjacs Jaca mihipos og 19 puntos, pito ka rebounds ug tulo ka assists sa dihang gilampornas sa White Wolves ang Night Squad, 72-52, alang sa ikaduha nilang daog sud sa tulo ka duwa, samtang si Marvin Plenos mipupo og 26 puntos, 10 ka rebounds ug lima ka assists alang sa Rustans, nga milampos sa ikaduhang higayon sa lima ka duwa human nakaipsot batok sa Labangon Reapers, 61-59.