Bornfree milkulit og record sa Amicis caging

CEBU, Philippines — Ang Bornfree maoy nangu sa listahan sa pasiunang mga mananaog sa 30-above division sa Amicis Basketball League (ABL) Season 2 didto sa Consolacion covered court.

Si Michael Hoyohoy mikadlit og 35 puntos, siyam ka rebounds ug lima ka assists aron pangulohan ang Bornfree ngadto sa 154-125 nga demolisyon sa Top Gun sa labing dako nga iskor sa usa ka duwa sa kasayaysan sa ABL. Ang kinatibuk-an nilang iskor nga 279 record sab sa  liga.

Naka-angkon si Hoyohoy og igong suporta gikan nilang Kristoffer Cabajes ug Angelito Nexie nga nagumboya'g 57 puntos.

Si Andre Robin maoy nangu sa Top Gun uban ang 40 puntos samtang sila si Kent Juban ug Kier Semilla mitali og 27 ug 22 puntos sa pilderong kawsa.

Sa laing mga duwa, si Harold Javier mipupo og 31 puntos, siyam ka rebounds ug tulo ka assists sa dihang gipaksit sa Amigos ang Legendary, 92-78,  samtang si Andales Anajao mitali og 22 puntos ug tulo ka assists aron ituboy ang 032 Kicks by Miller ngadto sa 94-83 nga pagpayaka sa YYBC.

Sila si Raniel Capangpangan ug Joseph Bill Pepito nagparamdam sab sa Amigos human nagkumbinar og 28 puntos samtang sila si Bryan Sagarino ug Elwin Abrenica nakatigum og 30 puntos alang sa 032 Kicks.

Wala sab magpabitin si Louie Malagar nga miharos og 22 puntos, unom ka rebounds ug upat ka assists sa dihang gikastigo sa RCBC Gamsi ang Los Amigos, 100-78.

Si Malagar gipaluyohan nilang Nino Pilapil ug Nikko Chaves nga nakatigum og 25 puntos.