Ring legend Bernabe Villacampo mipanaw, nagbilin og legasiya

CEBU, Philippines — Ang Pilipinas nawad-an og usa sa labing ngilngig niining mga boksidor tungod sa pagkamatay ni Cebuano ring legend Bernabe Villacampo niadtong Hunyo 4.

Natawo niadtong Hunyo 11, 1943 didto sa dakbayan sa Toledo, si Villacampo mag-79 anyos na unya niadtong Sabado, usa ka adlaw sa wala pa ang iyang lubong didto sa sam-ang sa Cansojong.

Ang ika-10 nga Pinoy nga nahimong world champion sunod nilang  Pancho Villa, Small Montana, Little Dado, Ceferino Garcia, Dado Marino, Flash Elorde, Roberto Cruz, Pedro Adigue ug Rene Barrientos, si Villacampo tataw nga nagbilin og malungtorang legasiya nga mahinumduman sa umaabot pang henerasyon.

Sa edad nga 19 anyos, si Villacampo nagsugod pagbaid sa iyang abilidad isip amateur boxer pinaagi sa pagsalmot og mga torneyo diin iyang girepresentahan ang iyang tunghaan, ang University of the Visayas (UV), niadtong 1962.

Sa Agosto sa susamang tuig, nahimo siyang pro ug midaog kalima sa nag-una niyang unom ka away pinaagi sa knockout.

Unom ka tuig ang milabay, na-angkon ni Villacampo ang labing dako nga away sa iyang karera sa dihang nakigsangaka siya ni Thai Chartchai Chionoi alang sa World Boxing Council (WBC) flyweight title niadtong Nobiembre 10, 1968 didto sa Carusathiars Stadium sa Bangkok, Thailand.

Nindot kaayo ang gipakitang salida ni Villacampo ugaling lang kay napilde siya pinaagi sa unanimous decision human sa makutas nilang 15 ka hugna nga binukbukay.

Ang maong kapildihan wala hinoon makabaraw sa damgo ni Villacampo nga mamahimong world champion.

Usa ka tuig ang milabay, si Villacampo nakahatag na gyud og dakong garbo ug dungog sa nasud human iyang gipukan ang Hapon nga si Hiroyuki Ebihara pinaagi sa unanimous decision aron sakmiton ang korona isip World Boxing Association (WBA) flyweight crown niadtong Oktubre 19, 1969 didto sa Prefectural Gymnasium sa Osaka, Japan.

Wala hinoon magdugay ang paghari ni Villacampo gumikan kay gibuntog siya ni Thai Berkrerk Chartvanchai pinaagi sa split decision sa una niyang depensa niadtong Abril 5, 1970 didto sa Bangkok.

Si Villacampo miretiro human siya gipatikangkang sa kababayan niyang si Danilo Macion sa ikalimang hugna niadtong Nobiembre 24, 1979 didto sa General Santos City.Gituldokan niya ang mabulokon niyang karera nga milanat og 17 ka tuig bitbit ang 39-21-5 win-loss-draw record uban ang 26KOs.