CEBU, Philippines — Ang mga Sugbuanong atleta mipakita og maanindot nga labok sa nagpadayong 31st Southeast Asian (SEA) Games didto sa Hanoi, Vietnam.
Human sa usa ka semana nga kumbati sa torneyo nga mahitabo kausa lamang sud sa duha ka tuig, ang mga Sugbuanon duna nay maanindot nga natampo sa Team Philippines uban ang duha ka gold, lima ka silver ug tulo ka bronze medals sa tulo ka lain-laing mga events.
Si Michael Angelo Marquez sa Barangay Lahug, Cebu City ug ang partner niining si Stephanie Sabalo milangkat og bulawang medalya (Chachacha) sa Latin discipline sa dancesport.
Samtang sila si Wilbert Aunzo ug Pearl Marie Cañeda, nga mikolekta og tulo ka golds sa miaging SEA Games niadtong 2019 diin ang nasud maoy host, naka-silver lamang ning higayona sa Samba ug duha ka bronze sa Rumba ug Latin–Paso doble.
Sa billiards, si Rubelyn Amit milampos pagdepensa sa iyang korona sa women's 9-ball human gipukan ang Singaporean nga si Jennifer Tan sa final, 7-2, alang sa ikalima niyang sagunson nga gold medal sa SEAG.
Sa bowling, si Alexis Sy nakabira og silver sa women's singles event sa labing nindot niyang salida sukad siya miapil sa SEA Games niadtong 2015.
Sa men's triathlon, si Andrew Kim Remolino mikubit og silver sa dalaygong 1-2 finish sa Team Phl diin ang kababayan niyang si Fer Caseres maoy mibulsa sa gold.
Si Remolino mipatak og usa ka oras, 59 minutos ug 16 segundos sa ikaduha niyang sagunson nga silver sa SEA Games.
Wala sab magpabitin si Raven Faith Alcoseba nga nakasakmit gilayon og bronze sa una niyang pagbanat sa SEA Games uban ang oras nga 2:18:30 sa women's triathlon.
Sila si Remolino ug Alcoseba ingon man si Pearl Cañeda lumad gikan sa dakbayan sa Talisay.