CEBU, Philippines — Si Rey Anthony Suerte milansang sa una niyang daog isip pro.
Og dili lang kana maoy iyang nakab-ot.
Gitabangan sab sa kanhi bitoon sa University of the Visayas (UV) ang Blackwater pagpakgang sa makauulaw niining sagunson nga pilde.
Ang 25-anyos nga si Suerte mitali og 16 puntos sa dihang giputol sa Bossing ang 29 ka sunod-sunod niining pilde human miposte og makapaisa'g balahibo nga kadaogan batok sa nagharing Magnolia Hotshots sa PBA Governor's Cup niadtong Miyerkules sa gabii didto sa Smart Araneta Coliseum.
Gawas sa dalaygon niyang opensiba, ang block ni Suerte ngadto ni Jackson Corpuz maoy nakasalbar sa Blackwater, nga nakatilaw sa katam-is sa kadaogan sa labing unang higayon sukad gipakaging niini ang NLEX niadtong Oktubre 17, 2020.
Ang import nga si Shawn Glover ug ingon man si Barkley Ebona mikuha sab og atensiyon sa maanidot nga pagpanamilit sa Blackwater ning season.
Si Glover mipabuto og 33 puntos, siyam ka rebounds ug pito ka assists samtang ang layup ni Ebona sa hilimatyong segundos sa duwa maoy nakapalikay sa Blackwater nga mabokya sa ikaduhang sunod-sunod nga komperensiya.