CEBU, Philippines — Ang kanhi Cebu collegiate basketball star nga si Rey Anthony Suerte nagpanikad na iya pro debut uban sa Blackwater Bossing karong adlawa diin ilang sangkaon ang Terrafirma Dyip sa PBA Governors' Cup didto sa Smart Araneta Coliseum.
Human nagsilbe sa Gilas national team sud sa duha ka tuig sukad siya gikuha nga No.2 pick sa Blackwater niadtong 2019 Gilas Special Draft, ang 25-anyos nga si Suerte hingpit nga mituman sa iyang damgo nga makaduwa sa PBA sa dihang mopirma siya og duha ka tuig nga kontrata uban sa Bossing niadtong Lunes.
Kon walay kakulian nga maabot, si Suerte mabunyagan og kayo isip pro sa dihang harongon sa Blackwater ang Terrafirma sa alas-4 sa hapon.
"Finally, a dream come true gyud as a basketball player," matud pa ni Suerte, nga na-MVP duha ka higayon human gitabangan ang University of the Visayas (UV) Green Lancers pagkasakmit og tulo ka sagunson nga kampiyonato sa Cebu Schools Athletic Foundation, Inc. (CESAFI) niadtong 2016 ngadto sa 2018.
"Di masabtan ang kalipay kay tungod bisan naa ta sa panahon sa pandemiya, natuman gihapon ang pangandoy nako nga mahimong usa ka PBA player," dason pa sa eksplosibong 6''2" nga wingman. "I'm super excited and also a little bit nervous kay another level of basketball na pud sa akong journey."
Nasayud hinoon si Suerte sa malisud nga tahas nga ilang sagubangon sa unahan ubos sa pagtimon ni coach Ariel Vanguardia.
Ang Blackwater wala pay daog sud sa lima ka duwa ning Govenors' Cup ug nag-antos sa 24 ka sunod-sunod nga pilde sa kinatibuk-an.
Ang garbo sa Monkayo, Davao de Oro andam hinoon nga moatubang ning maong hagit uban ang pasalig nga buhaton niya ang tanan kutob sa iyang mahimo aron tabangan ang Blackwater nga mabira ang dugay na niining gihandum nga daog.
"Akong buhaton tanan kutob sa akong makaya para makatabang sa team, ma-offense man o defense. Hopefully, makuha namo nang gihandum nga daog sa team sa umaabot," pasalig pa ni Suerte.