Damgo ni Suerte sa PBA natuman
CEBU, Philippines — Si Rey Anthony Suerte na ba kaha ang gipaabot sa Blackwater Bossing nga moputol sa ilang malas?
Mao kini ang dakong pangutana nga tubagon ni Suerte human ang kanhi Cebu collegiate basketball star mipirma og duha ka tuig nga kontrata uban sa Blackwater niadtong Lunes.
Ang Bossing wala pay daog sud sa lima ka duwa sa 46th PBA Governors' Cup, nga gikatakdang magsugod og balik karong Biyernes, Pebrero 11, didto sa Smart Araneta Coliseum.Sa kinatibuk-an, ang Bossing nag-antos sa makauulaw nga 24 ka sunod-sunod nga kapildihan.
Mao nang nanghinaut sila nga maka-angkon og kaayo sa pag-abot ni Suerte sa ilang poder. Ang Blackwater unang mikuha ni Suerte isip ilang second pick sa Gilas Pilipinas Special Draft niadtong 2019.
Human sa duha ka tuig sa national team, ang Samahang Basketbol ng Pilipinas (SBP) nakahukom nga i-release si Suerte nga maoy nag-abli sa dalan sa garbo sa Monkayo, Davao de Oro aron tumanon ang iyang damgo nga makaduwa sa PBA.
Ang 25-anyos nga wingman unang mihimo og pangan isip miyembro sa University of the Visayas (UV) Green Lancers sa Cebu Schools Athletic Foundation, Inc. (CESAFI).
Gitabangan ni Suerte ang Lancers pagsakmit og talagsaong grandslam title sa CESAFI gikan niadtong 2016 ngadto sa 2018. Sa maong tulo ka sagunson nilang kampiyonato, gibayaw siya nga Most Valuable Player sud sa duha ka higayon niadtong 2016 ug 2018.Si Suerte mihimo sab og impresiyon sa usa ka tuig niyang salida uban sa University of the East (UE) Reed Warriors sa University Athletic Association of the Philippines (UAAP).
Karon nga usa na siya ka pro, pas-anon ni Suerte ang mabug-at nga misyon nga mao ang pagpakgang sa nagkadenang pilde sa Blackwater sa PBA.