CEBU, Philippines — Sila si FIDE Arbiter Linky Yap ug Sheila Khan Sepaton nanghawod sa tagsa-tagsa nila ka mga dibisyon sa Happy Fiesta Opon 2021 online chess tournament nga gipasiugdahan sa Cebu Executives and Professionals Chess Association (CEPCA) niadtong weekend.
Ang 64-anyos nga si Yap, kanhi varsity player sa University of Visayas (UV) chess team ug amahan ni International Master Kim Steven Yap, mitali sa labing taas nga 7.0 puntos aron langkaton ang All-Cepcans title.
Sila si Sepanton, Reynaldo Flores, ug Jasper Norman Montejo mi-okupar sa ikaduha ngadto sa ikaupat nga dapit uban ang 6.5 puntos matag usa samtang sila si Maria Kristine Lavandero ug Kristina Belano maoy nagkumpleto sa top 6 bitbit ang parehong 6.0 puntos.
Sa iyang bahin, ang 29-anyos nga si Sepanton gikoronahang hara sa Cepcans B/Ladies category. Ang ex-varsity player sa Central Philippines University (CPU) sa Iloilo mitapos sa iyang kampanya uban ang 38 puntos.
Si Lavandero mipahiluna sa ikaduhang dapit uban ang 28 puntos ug gisundan kini ni Magno Dionson, Jr. nga dunay 25 puntos. Naglangkob sa top 5 sila si Randy Cabuncal ug Olayvar bitbit ang 24 puntos matag usa.
Ang kaluhang torneyo gipaluyohan ni Engr. Achilles Olis.