The Bachelors nanghawod sa 1st Hinulawan chessfest

CEBU, Philippines — Ang The Bachelors maoy milugwa nga kampiyon sa 1st Hinulawan Festival 3 on 3 Chess Tournament nga giduwa niadtong weekend didto sa CEBECO III covered court sa Toledo City.

Gilangkoban nilang Richard Natividad, Redentor Nailon, ug Dennis Navales, ang The Bachelors ug ang Team Jaz nilang Rommel Ganzon, Lemuel Montero, ug Jerome Cabantan nagtabla uban ang 15.0 puntos human sa siyam ka hugna nga kompetisyon apan ang The Bachelors maoy mibira sa P20,000 nga ganti gumikan sa mas taas nilang tiebreaker.

Ang Pawncheck nilang Bryle Arellano, Neil Adrian Gilig, ug Daniel Lorenzo Minoza, ug ang Dark Knights nilang NM Rogelio Enriquez Jr., Ariel Joseph Abellana, ug Delfin Yano parehong mikulit og 14.0 puntos apan ang Pawncheck maoy nalandig sa ikatulong dapit gumikan sa mas dako niining tiebreak points.

Ang Tabaghak Masters nilang Bonn Rainauld Tibod, Christopher Tubalado, ug Bhell Ortiz, E.C. PRO nilang Arnolito Cadiz, Jeffu Dorog, ug Edsel Vosotros, ug ang Sui Generis nilang IM Rico Mascarinas, Atty. Jeah Jean Gacang, ug Carlos Trocio maoy mipahiluna sa ikalima ngadto sa ikapitong luna bitbit ang 13.0 puntos matag usa.

Sa kiddies division sa duha ka adlaw nga aksiyon ubos sa superbisyon ni FIFE Arbiter Felix Poloyapoy Jr., si Glydel Janine Rodrigo maoy milangkat sa korona uban ang 8.0 puntos.

Si Reduard Contaoi mitapos sa ikaduhang dapit uban ang 7.5 puntos samtang sila si Drake Lester Basaca, Apple Rubin, Rico Mascarinas Jr., Don Chloe Tigley, ug Hannah Lynne Jumao-as maoy mi-okupar sa ikatulo ngadto sa ikapitong puwesto bitbit ang 6.0 puntos matag usa.