Nietes sama sa bino

Dili lalim ang kinabuhi sa usa ka boksidor, kansang trabaho makighilam-osay og kumo ibabaw sa ring. Mao nang tagsa ra kaayo ang makalahutay ug molungtad ning matang sa paugnat sa kusog ilabi na kay lawas ra'y ilang puhonan sa ilang pagpanimpad. Samtang ikaw magkadugay sa pamuksing, dili ikalimod nga maghinay-hinay sab og kakunhod ang imong abilidad ilabi na kon kusog ug lihok ang hisgutan.

 Apan lahi ang nahitabo ni four-division world champion Donnie 'Ahas' Nietes. Sa edad nga 38-anyos, anaa na unta siya sa talisaop nga bahin sa iyang karera. Apan ang garbo sa Murcia, Negors Occidental nagpabiling hait, anaa sa ensaktong kondisyon, ug usa gihapon ka dekalibreng puwersa sa natad sa binukbukay.

Gipamatud-an kana ni Nietes 11 ka adlaw pa lamang ang milabay. Niadtong Abril 4 didto sa Caesars Bluewaters Dubai, iyang gitudloan og leksiyon ang Colombian nga si Pablo Carrillo dayon na ngadto sa pagsakmit sa WBO Intercontinental super flyweight title.

Si Nietes wala makaaway kapin sa duha ka tuig. Mao kadto ang labing unang higayon nga mipakita siya'g aksiyon sud sa 47 ka bulan. Apan bisan gamay wala siya magpakita og timailhan nga gitay-an ang iyang inawayan sa dominante niyang pagkastigo ni Carrillo.

Sa impresibo niyang salida batok ni Carrillo, gipamatud-an ni Nietes nga duna pa siya'y ikabuga ug labaw sa tanan duna pa'y kapasidad nga mamahimong world champion og usab. Mao nang iyang gisaytan sunod ang labing tadhan nga mga super flyweights karon sa kalibutan sama nilang Juan Francisco Estrada, Carlos Cuadras, Roman 'Chocolatito' Gonzalez ug Srisaket Sor Rungvisai. Duna sa'y purohan nga magbangga sila sa kababayan niyang si IBF super flyweight champion Jerwin Ancajas o dili ba mag-rematch sa Hapon niyang karibal nga si Kazuto Ioka.

Kining tanang anaa sa panglantaw ni Nietes ug sa dili magdugay matuman ra ang damgo niyang away. Dako kaayo kining posible tungod sa wa'y pagbahar niyang kabangis ug kalig-on bisan pa man sa iyang pangedaron. Si Nietes disiplinado, kugihan, determinado ug labaw sa tanan wa'y bisyo. Nagkadugay nagkalami siya sama sa usa ka bililhong bino.

KNAK AWT Emmanuel Villaruel

Nietes sama sa bino

Dili lalim ang kinabuhi sa usa ka boksidor, kansang trabaho makighilam-osay og kumo ibabaw sa ring. Mao nang tagsa ra kaayo ang makalahutay ug molungtad ning matang sa paugnat sa kusog ilabi na kay lawas ra'y ilang puhonan sa ilang pagpanimpad. Samtang ikaw magkadugay sa pamuksing, dili ikalimod nga maghinay-hinay sab og kakunhod ang imong abilidad ilabi na kon kusog ug lihok ang hisgutan.

 Apan lahi ang nahitabo ni four-division world champion Donnie 'Ahas' Nietes. Sa edad nga 38-anyos, anaa na unta siya sa talisaop nga bahin sa iyang karera. Apan ang garbo sa Murcia, Negors Occidental nagpabiling hait, anaa sa ensaktong kondisyon, ug usa gihapon ka dekalibreng puwersa sa natad sa binukbukay.

Gipamatud-an kana ni Nietes 11 ka adlaw pa lamang ang milabay. Niadtong Abril 4 didto sa Caesars Bluewaters Dubai, iyang gitudloan og leksiyon ang Colombian nga si Pablo Carrillo dayon na ngadto sa pagsakmit sa WBO Intercontinental super flyweight title.

Si Nietes wala makaaway kapin sa duha ka tuig. Mao kadto ang labing unang higayon nga mipakita siya'g aksiyon sud sa 47 ka bulan. Apan bisan gamay wala siya magpakita og timailhan nga gitay-an ang iyang inawayan sa dominante niyang pagkastigo ni Carrillo.

Sa impresibo niyang salida batok ni Carrillo, gipamatud-an ni Nietes nga duna pa siya'y ikabuga ug labaw sa tanan duna pa'y kapasidad nga mamahimong world champion og usab. Mao nang iyang gisaytan sunod ang labing tadhan nga mga super flyweights karon sa kalibutan sama nilang Juan Francisco Estrada, Carlos Cuadras, Roman 'Chocolatito' Gonzalez ug Srisaket Sor Rungvisai. Duna sa'y purohan nga magbangga sila sa kababayan niyang si IBF super flyweight champion Jerwin Ancajas o dili ba mag-rematch sa Hapon niyang karibal nga si Kazuto Ioka.

Kining tanang anaa sa panglantaw ni Nietes ug sa dili magdugay matuman ra ang damgo niyang away. Dako kaayo kining posible tungod sa wa'y pagbahar niyang kabangis ug kalig-on bisan pa man sa iyang pangedaron. Si Nietes disiplinado, kugihan, determinado ug labaw sa tanan wa'y bisyo. Nagkadugay nagkalami siya sama sa usa ka bililhong bino.