Lima ka players nibiya sa Alcantara bubble sa VisMin Super Cup

CEBU, Philippines — Gipasulabi sa lima ka magduduwa nga magpabilin sa Maharlika Pilipinas Basketball League (MPBL) ug nibiya sa Alcantara bubble alang sa Visayas leg sa Pilipinas VisMin Super Cup niadtong Martes.

"Yes, there are players who have left our bubble and we respect their decision," matud pa ni league chief operating officer Rocky Chan.

Ang mga players naglakip nilang Enrico Llanto ug Edrian Lao nga  moduwa unta sa ARQ Builders/Lapu-Lapu City Heroes, JR Ongteco sa KCS Computer Specialist/Mandaue City, Tristan Albina ug Jaymar Gimpayan sa MJAS-Zenith/Talisay City Aquastars. Sila si Llanto ug Lao niduwa sa Bataan ug Cebu City sa MPBL. Si Lao niduwa sa Bicol sa miaging season, samtang sila si Gimpayan ug Albina niduwa sa  Valenzuela.

Matud pa ni Chan, nga ang ARQ Builders, KCS Computer Specialist ug MJAS-Zenith mahimong mokuha og bag-ong players puli sa nihawa nga mga magduduwa hangtod karong adlawa.

Nibiya ang lima ka magduduwa human si MPBL commissioner Kenneth Duremdes mipahinunumdom sa liga nga ang teams ug players nga mopakita'g aksiyon sa mga propesiyonal nga liga sama sa Pilipinas VisMin Super Cup, National Basketball League-Pilipinas ug maski gani sa Asean Basketball League (ABL) isipon na nga ex-pros sa mga mata sa MPBL nga gitukod ni Filipino boxing icon Manny Pacquiao.

Lain pang mobanat sa Visayas leg mao ang Tabogon-Cebu Voyagers, Tubigon-Bohol Mariners, Dumaguete Warriors ug Siquijor Mystics.

Ang Pilipinas VisMin Super Cup nga maoy labing bag-ong professional basketball league sa Pilipinas ug labing una nga nakabasi sa habagatang mga probinsiya sa nasud, buksan ugmang adlawa didto sa Alcantara Civic Center sa lungsod sa Alcantara, habagatang Sugbo.