Salamat, Sir Dodong

Mangitngit nga panganod ang miputos sa tibuok Sugbo atol sa pagpanaw sa usa sa labing tinamod ug tinahod niining anak nga si Dr. Jose 'Dodong' Rivera Gullas tangkod usa ka semana na ang milabay.

Ang tsirman sa The Freeman ug Banat News ug kanhi executive vice president sa University of the Visayas (UV) nag-edad og 87. Sa iyang pagtaliwan, dili lamang kami nga iyang mga empleyado ang nagbangutan, apan hasta sab ang liboan ka mga tawo kansang kinabuhi iyang natandog apil na ako ug ang akong pamilya.

Dili hitupngan ang mga kabilin ni sir Dodong isip pilantropo, haligi sa edukasyon ug media, magbabalaod, tagatipig sa Sugbuanong kasaysayan, kultura ug musika, ug ingon man sa natad sa sports. Labaw sa tanan, dili siya mahikalimtan sa iyang pagkarelihiyoso ug pagkamahadlukon sa Ginoo timaan sa wa'y puas niyang pag-alagad sa simbahan hangtod sa talisaop nga bahin sa iyang kinabuhi. Nahimo siyang hayag nga ehemplo sa maayong gawi ug tul-id nga dalan nga iyang gilakwan.

Apan taliwala sa dili maihap niyang mga nakab-ot inubanan sa hait niyang kaalam ug kinaadman, nagpabilin si sir Dodong nga mapaubsanon. Pareho ang iyang pagtagad sa kon kinsa man gani nga tawo ang iyang ikaatubang. Unsa man ang estado ug papel nimo sa katilingban, hangpon ka niya nga dunay respeto ug dignidad. Dili sab masukod ang iyang pagkamaayo ug pagkamanggihatagon ilabi na niadtong mga labing nanginahanglan. Lumo ang iyang pagbati ug wa'y sama ang iyang pagpangga niadtong mga kabos ug hinikawan sa maayong palad. Mao nang gabaha sab ang gibati og kagul-anan sa iyang pagbiya ning kalibotan.   

Kagahapong adlawa, si sir Dodong gipahiluna na sa hingpit niyang pahulayan sud sa Archbishop Teofilo Camomot Shrine nga siya mismo ang nagpatukod didto sa Barangay Valladolid,Dakbayan sa Carcar. Usa kini sa mga katapusan niyang mga hangyo ug naatol pa kini sa ika-107 nga sumad sa adlaw'ng natawhan ni Arsobispo Teofilo Camomot. Ang nitso ni sir Dodong giplastada duol sa lubnganan ni Arsobispo Camomot, kansang pagka-Santo hugtanon kaayo niyang gisuportaan.

Usa sa mga bulawanong pagtulon-an sa kinabuhi nga kinaham ipaambit ni sir Dodong mao nga kitang tanan nagpuyo sa hinulman nga oras ug lumalabay lamang. Nahanaw na man tuod siya sa atong panan-aw, apan sa kanunay nakatatak siya sa atong alimpatakan tungod sa legasiya niyang gibilin nga angay natong handumon, hinuklogan ug isabwag aron mahimong sumbanan sa uban. Sa ingon si sir Dodong magpabiling buhi sa tagsa-tagsa nato ka mga dughan ug magsud-ong nato nga malipayon ibabaw sa kalangitan nga iyang nahimutangan.