Bulsa ni Arum maoy agdon

Gisabwag og balik ni Pinoy ring star Manny Pacquiao ang iyang baruganan nga wala siya'y atrasan nga away.

Sa iyang kinabuhi, dili niya batasan nga motikalikod sa usa ka hagit ilabi na kon ang iyang dungog ug garbo maoy nakataya.

Dili pa lamang dugay, si Pacquiao namahayag nga buot niyang sangkaon ang labing bug-at nga mga pangan sa welterweight division diin siya kasamtangang nahimutang. Apil sa iyang mga ginganlan mao sila si WBO champion Terence Crawford (37-0, 28KOs) ug IBF/WBC champion Errol Spence (27-0, 21KOs) nga parehong wa'y mga pilde ug ingon man si kanhi two-division world champion Mikey Garcia (40-1, 30KOs).

Ang bugtong eight-division world champion nagparamdam nga andam na siyang mobalik og away human mipabuhagay sa iyang Twitter dili pa lamang dugay nga nagsugod na siya sa iyang training camp agi'g pangandam sa pagkatkat niya og balik sa ring lagmit karong Mayo didto sa Dubai.

Sa tulo ka dekalibreng personalidad nga iyang gihisgutan, si Crawford maoy labing kursanada nga makasangka sunod ni Pacquiao.

Nindot kaayo ang maong away nga seguradong gusto sab mahitabo sa mga boxing fans tibuok kalibotan.

Apan duna ko'y nasigpatan nga usa ka dakong problema nga posibleng makadiskaril sa mga plano ug gustong mahitabo ni Pacquiao.

Mibungat siya og $40 million kon dul-an P2 billion ngadtong Top Rank promoter Bob Arum aron makaharong si Crawford. Si Arum nailhan sa pagpasiugda niini og pipila ka mga dagko ug makasaysayanong away. Sa iyang karera nga milanat og pipila na ka dekada, tatak nang Arum nga dili mahadlok mogasto ug andam morisgo kon kuwarta maoy hisgutan aron makapahigayon og usa ka higanteng promosyon. Sagad sa iyang mga pasundayag nakahakot og dakong ganansiya.

Apan sukwahi sa nangaging panahon, lahi kaayo ang sitwasyon karon ilabi na kon ang ekonomikanhong aspeto sa promosyon ang hisgutan taliwala ning pandemiya. Gawas nga nihit pa kaayo ang mga sponsor, wala pa sa'y madawdaw ang promoter sa live gate sales gumikan kay gidad-an pa man o dili ba kaha limitado pa ang gidaghanon sa fans mga makasud sa binyu ning higayona.

Mao nang sa gipangayo nga kantidad ni Pacquiao aron maka-engkuwentro si Crawford, ang tanan mag-agad sa mga kamot ni Arum, kon unsa kalawom ang iyang bulsa ug kahait sa iyang diskarte aron mapahigayon ang dugay na kaayong giguhon-hugon nga bugno tali sa duha ka mga banggiitang boksidor.