Mon Fernandez gitudlo isip Chef de Mission

CEBU, Philippines — Si PSC Commissioner Ramon 'El Presidente' Fernandez gitudlo isip Chef de Mission (CDM) sa Pilipinas alang sa 31st Southeast Asian Games didto sa Hanoi, Vietnam sa Nobiyembre 21 hangtod sa Disyembre 2, 2021.

Mismo si Philippine Olympic Committee (POC) nga si Abraham 'Bambol' Tolentino ang mitudlo ni Fernandez atol sa unang executive board meeting niadtong Martes didto sa East Ocean Palace sa Pasay City.

Ang PBA All-time leading scorer ug 4-time MVP maoy modumala sa preparasyon ug partisipasyon sa SEA Games.

Bisan bag-o pa si Fernandez sa maong katungdanan, sinati na niya ang tahas nga moduma sa mga gimbuhaton kay nahimo man siyang assistant chairman ni PSC chairman William 'Butch' Ramirez, kinsa maoy Chef de Mission sa 30th Southeast Asian Games dinhi sa Pilipinas niadtong Disyembre 2019.

"I am humbled and honored to be appointed," matud pa sa PBA legend. "I will work hard to live up to the challenge and duplicate the success that chairman Butch (Ramirez) was able to accomplish. With his help and guidance, we will still be able to perform well in Vietnam."

Sa panahon ni Ramirez, ang Pilipinas nidaog sa overall championship sa 2019 SEA Games nga mihakot og 149 ka bulawang medalya.

Isip atleta, si Fernandez aduna na'y kasinatian sa multi-sports competition.

Gawas nga nidala sa bandera sa Asian basketball championship, si Fernandez niduwa sab sa Philippine team nga nidaog og silver medal sa 1990 Asian Games sa Beijing. Mipakita sab siya og aksiyon sa 1974 Asiad sa Tehran.

Si Fernandez makigtagbo sa POC Board sa hinapos nga bahin ning bulana aron ipresentar ang iyang mga plano sa programa.  

Mga plano sa programa ni Fernandez mao ang pakisayod sa mga numero sa sports events ug gidaghanon sa mga atleta nga ipadala aron mokumbati sa biennial games. Dakong hagit ni Fernandez isip CdM mao kon unsaon niya pag-adres ang sitwasyon karon tungod sa Covid-19 pandemic.