IM Pimentel maoy grand champion

Stay at Home Chess Challenge

CEBU, Philippines — Si International Master Joel Pimentel sa Bacolod City maoy grand champion sa Stay at Home Chess Challenge nga giorganisar sa Cebu School of Chess inabagan sa Chess Infinitum, Inc. ubos sa pagpangu sa presidente niining si Benjamin "Boojie" Lim.

Atol sa "Finale" nga giduwa sa lichess.org niadtong Sabado, ang 27-anyos nga si Pimentel mihuman sa siyam ka hugna nga kompetisyon bitbit ang kinatas-ang 7.5 puntos aron langkaton ang titulo nga nagtangag og P7,000 nga ganti. Ang Sugboanong National Master nga si Merben Roque mibulsa og P5,000 human mipahiluna sa ikaduhang dapit uban ang 7.0 puntos. Si Sherwin Tiu sa Manila mitali og 6.5 puntos aron paglandig sa ikatulong puwesto, samtang ang Boholanong si IM Oliver Dimakiling mitapos ikaupat uban ang 6.0 puntos.

Sila si IM Barlo Nadera ug NM Rommel Ganzon nga parehong mga Sugboanon, maoy mi-okupar sa ikalima ug ikaunom nga dapit bitbit ang 5.0 puntos, samtang sila si Kyle Sevillano ug FIDE Master Mari Joseph Turqueza mipatong sa ikapito ug ikawalo bitbit ang 4.5 puntos. Naglangkob sa top 12 mao sila si FM Alekhine Nouri, John Dave Lavandero, Kevin Codinera ug Crizelda Cruz.