Medina kampiyon sa Jojo Dondon Super Blitz 7

CEBU, Philippines — Lumad gikan sa Cabuyao, Laguna nga si Vince Angelo Medina maoy midominar sa Engr. Jojo Dondon Super Blitz 7 niadtong weekend.

Ang 24-anyos nga si Medina, kanhi kampiyon sa Shell National Youth Active Chess, Palarong Pambansa ug ASEAN Age-Group, mikulit sa kinatas-ang 13.5 puntos aron langkaton ang titulo sa torneyo nga giorganisar  sa Cebu Executives and Professionals Chess Association (CEPCA) ug gipaluyohan ni US Candidate Master Engr. Jojo Dondon, usa ka Cepcan nga atua na karon magbasi sa Allen, Texas.

Ang taga-Manila nga si Sherwin Tiu mipahiluna sa ikaduhang dapit uban ang 13.0 puntos, samtang ang Sugboanong International Master nga si Barlo Nadera  nalandig sa ikatulong puwesto bitbit ang 12.0 puntos.

Naglangkob sa top 7 mao sila si National Master Giovanni Medjia (11.0), Michael Joseph Pagaran (10.5), Richard Natividad (10.5) ug Allan Pason (10.0)

Lain pang nag-unang mga mananaog mao sila si Archt. Filemon Kapuno III sa CEPCA Weekend Online Chess, NM Rommel Ganzon sa Happy Fiesta Opon 2020 ug Engr. Eladio Lim III sa Prexy Jerry Sunday Blitz.