CEBU, Philippines — Ang beteranong player gikan sa Bacolod City nga si Ted Ian Montoyo maoy nakampiyon sa Alex Chua Super Blitz 6 nga giorganisar sa Cebu Executives and Professionals Chess Association (CEPCA).
Si Montoyo mitali sa labing taas nga 13.0 puntos aron dominahon ang torneyo nga gipaluyohan nilang US-based Cepcans Engr. Alex Chua, usa ka nursing Administrator sa Fidelity Health Care Nursing Home didto sa Los Angeles, California ug US Candidate Master Engr. Jojo Dondon sa Allen, Texas.
Ang pambato sa Lapu-Lapu City nga si Allan Pason maoy mipahiluna sa ikaduhang puwesto uban ang 12.0 puntos.
Sila si National Masters Rommel Ganzon (Cebu), Julius Sinangote (Manila), ug Edsel Montoya (Cebu) nagtabla bitbit ang 11.0 puntos matag usa, apan si Ganzon maoy miangkon sa ikatulong dapit kortesiya sa mas taas niining tie-breaker. Sila si Sinangote ug Montoya maoy miokupar sa sunod nga duha ka luna.
Sa special awards, ang top 2 mao sila si Venancio Loyola ug NM Rogelio Enriquez Jr. sa Cepcans A, ug Engr. Archie Garzon ug Dr. Leo Lofranco sa Cepcans B samtang si Edelyn Vosotros maoy labing maayo nga babayeng entrante.
Ang uban pang nag-unang mananaog mao sila si Michael Tinga sa David Bourne Invitational, Reynaldo Flores sa CEPCA Blitz Group B/Ladies, ug Dr. Leo Lofranco sa Prexy Jerry Maratas Arena.