Kanhi GM sa Rockets gikuhang presidente sa Sixers
CEBU, Philippines — Ang kanhi general manager sa Houston Rockets na si Daryl Morey gikuha sa Philadelphia 76ers isip ilang presidente sa basketball operations. Si Morey nahimong kontrobersiyal gumikan sa iyang tweet nga nagsuporta sa mga nagprotesta sa Hong Kong sa miaging tuig nga nagkadagkot sa panagbangi tali sa NBA ug China.
Sa usa ka pamahayag, ang Sixers mipadayag nga ang 48-anyos nga si Morey maoy haum nilang gipili aron tabangan ang Sixers nga mamahimong championship contenders sa umaabot nga NBA season.
Sa 13 ka tuig niyang pagserbisyo sa Rockets, ang team miposte og 640-400 win-loss record ug kanunay sab makasud sa playoffs.
Niadtong 2018, si Morey maoy gipasidunggan nga NBA Executive of the Year. Bisan pa sa iyang mga komento nga nakaaslom sa relasyon sa NBA ug China nga miresulta ngadto sa pagka-alkansi sa NBA og $400 million, gipaluyohan siya ni commissioner Adam Silver ug Houston Rockets owner Tilman Fertitta.
- Latest
