4 ka Cebuana apil sa makasaysayanong WNBL Draft

CEBU, Philippines — Upat ka Cebuana ballers ang makasalmot sa labing unang Women's National Basketball League (WNBL) Draft nga ipahigayon sa hinapos nga bahin ning bulana.

Kini mao sila si Clarissa Lanuza, Katherine Jumapao, Sofia Dawn Felisarta ug Joei Lyn Ceniza.

Si Lanuza, ang labing unang MVP sa women's division sa Cebu Schools Athletic Foundation, Inc., maoy nangu sa University of Cebu (UC) Lady Webmasters ngadto sa tulo ka sagunson nga CESAFI title niadtong 2006, samtang si Jumapao, usa ka beauty queen nga miapil sa Miss Cebu pageant lima ka tuig na ang milabay, kanhi sakop sa University of San Carlos (USC) Lady Warriors.

Si Jumapao usa ka multi-sport athlete kay nakaduwa man sab siya sa USC volleyball team ug misuway sab og endurance sports sa wala pa ang WNBL.

Sa laing bahin, sila si Felisarta ug Ceniza pulos lumad nga Sugboanon, apan nagduwa og basketbol sa kolehiyo uban sa University of Sto. Tomas (UST) ug Cavite State University (CSU).

Gikan sa 702 ka mga aplikante alang sa makasaysaynong draft sa labing unang women's pro basketball league sa nasud, gipakanan kini  ngadto na lang sa 177 human sa subsob nga ebalwisyon sa screening committee.

Ang mga draftees mopakita sa ilang talento ngadto sa mga teams atol sa WNBL Draft Combine didto sa Bren Z. Guiao Convention Center sa San Fernando, Pampanga sa mga petsa nga gipinalisar pa samtang sa pagsulat ning balita.