CEBU, Philippines — Usa ka dakong gubat maoy gipangandaman ni kanhi four-division world champion Roy Jones Jr. sa umaabot nilang walo ka hugna nga exhibition bout ni Mike Tyson karong Septiyembre 12 didto sa Dignity Health Sports Park sa Carson, California.
Angayan lamang kining buhaton ni Jones human si Tyson mibahad nga palukapahon siya niini sa giatngan nilang sangka.
Ang pamahayag ni Tyson sukwahi sa giingon ni Andy Foster, ang pangu sa California State Athletic Commission, nga ang 54 -anyos nga si Tyson ug ang 51-anyos nga si Jones magbinukbukay lamang sa usa ka huego-todo nga sparring.
Apan giklaro ni Jones nga kinahanglan gyud nga depensaan niya ang iyang kaugalingon sama sa anaa siya sa usa ka tinuoray nga sangka.
Nagkanayon si Jones nga gamay kaayo siya kon itandi ni Tyson mao nga kinahanglan siyang magmatngon ilabi na kon biradahan na siya sa labing bata nga heavyweight champion sa kasaysayan sa boksing.
"I have to get myself ready for whatever Mike may bring. I have to be ready for war," matud pa ni Jones nga mikulit og record isip bugtong boksidor nga nag-pro sa junior middleweight ug nahimong world heavyweight champion.
Inilog tuod si Tyson, apan si Jones dunay bentaha sa ilang tapad.
Sukwahi ni Tyson nga wala na makapakita'g aksiyon sukad siya miretiro human gipilde ni Kevin McBride niadtong 2005, si Jones mi-away kanunay bisan og padung na sa edad nga 50-anyos. Si Jones katapusang mikatkat sa ring niadtong Pebrero 2018 diin iyang gikulata si Scott Sigmon.