CEBU, Philippines — Gipinalisar na sa New York Knicks ang kasabotan aron pormal nga maghimo ni kanhi NBA Coach of the Year Tom Thibodeau isip sunod nilang coach.
Gitaho sa New York Times ug ESPN nga anaa na sa final stage ang negosasyon ug segun sa ESPN, lima ka tuig ang kontrata nga itanyag sa Knicks ngadto ni Thibodeau nga kanhi ilang assistant coach ubos ni Jeff Van Gundy gikan niadtong 1996 ngadto sa 2004.
Si Thibodeau dunay 352-246 win-loss record sa walo niya ka season isip NBA head coach uban sa Chicago Bulls (2010-2015) ug Minnesota Timberwolves gikan sa 2016 ngadto sa Enero 2019 sa dihang gipalagpot siya human nagkasungi sila si Jimmy Butler.
Niadtong 2011, si Thibodeau gibayaw nga NBA Coach of the Year human ang Bulls mikulit og 62 ka daog ug miabante sa Eastern Conference finals. Uban sa New York, bug-at nga tahas ang pas-anon ni Thibodeau nga nagkagidlay ang agi sa milabay'ng unom ka tuig ug kausa lamang makadaog sa usa ka playoff series sukad niadtong 2000.