Casimero lagmit moaway og laing kontra
CEBU, Philippines — Hangtod karon nagpabiling wala pa'y klaro kon kanus-a ipahigayon ang nasibog nga unification bout tali nilang WBO bantamweight champion Johnriel 'Cuadro Alas' Casimero ug WBA/IBF champion Naoya 'Monster' Inoue.
Ang garbo sa Ormoc City ug ang pambato sa Japan gikatakda untang magharong niadtong Abril 25 didto sa Mandalay Bay Events sa Las Vegas, apan giuswag kini sa petsa nga hangtod karon wala pa hisaryi gumikan sa pandemiya.
Misamot pa og kahanap ang away gumikan sa labing uwahing pamahayag ni Top Rank promoter Bob Arum nga kon dili mosugot si Casimero nga kaltasan ang iyang premyo dili mahinayon ang away nilang Inoue.
Segun sa lindog ni Quinito Henson sa The Philippine STAR, si Sean Gibbons, ang presidente sa MP Promotions nga maoy nagdala sa karera ni Casimero, nagkanayon nga si Casimero lagmit modepensa na lang sa iyang bakus karong Oktubre kon dili gyud mahitabo ang away nilang Inoue.
Sa pagka karon hinuon, si Gibbons miingon nga ila pang gitimbang-timbang ang sitwasyon gumikan kay ang tanan posible pang mahitabo. Giangkon hinuon ni Gibbons nga si Casimero hapit na mawad-i og pasensiya gumikan sa iyang nadangatan kay niadto pang Marso kini mitaak sa Las Vegas aron unta sangkaon si Inoue, apan hangtod karon wala pa gihapo'y klaro kon madayon ba o dili ang away.
- Latest
