Bucks star guard Bledsoe nagpositibo sa virus

CEBU, Philippines — Nagpositibo sab sa Covid-19 ang pambatong point guard sa Milwaukee Bucks nga  si Eric Bledsoe hinungdan nga wala kini mikuyog sa iyang teammates didto sa Orlando, Florida diin sugdan og balik sa liga ang nahunong niining season.

Ang 30-anyos nga si Bledsoe, kinsa anaa karon sa ika-10 niyang season sa NBA, mi-average og 15.4 points, 5.4 assists ug 4.6 rebounds sa Bucks nga maoy nagkupot sa labing nindot nga 53-12 record sa liga sa wala pa kini naundang niadtong Marso gumikan sa pandemiya.

Matud pa ni Bledsoe ngadto sa ESPN nga wala siya magpakita og sintomas ug maayo ang iyang paminaw samtang nagkwarantin sa ilang balay. Kon ugaling makarekober na, si Bledsoe naglantaw sa unahan nga makauban ang iyang team sa Orlando diin magkumbati ang 22 ka teams sa nahibiling bahin sa season.

Unang sangkaon sa Bucks ang LA Lakers karong Hulyo 30 (Hulyo 31 dinhi sa Pilipinas).

Ang Bucks, ubos sa pagpangu ni Giannis Antetokounmpo naglaraw nga mosakmit sa labing una nilang kampiyonato sukad niadtong 1971. Nakaabot sila sa Eastern Conference finals sa miaging season, apan gibuntog sa Torondo Raptors.