Suerte nabaraw

CEBU, Philippines — Walay duda nga si Rey Anthony Suerte usa sa mga sumusulbong nga bitoon sa Philippine basketball.

Una siya mitatak og pangan human nakadaog og duha ka season MVP awards ug naka-grandslam sa University of the Visayas (UV) Green Lancers sa Cebu Schools Athletic Foundation, Inc. (CESAFI) gikan niadtong 2016 ngadto sa 2018.

Si Suerte milayat sa nasudnong pagkasikat pinaagi sa impresibo niyang salida uban sa Che'Lu Bar and Grill sa 2019 PBA D-League ug ingon man sa dalaygon niyang 'one-and-done deal' sa University of the East (UE) Red Warriors sa miaging tuig.

Nakahimo si Suerte og dugang impresyon human mipabuto og career-high 31 puntos sa dihang gipakuratan sa Red Warriors ang La Salle Green Archers, 89-88 alang sa una nilang daog sa UAAP Season 82.

Human sa liga, si Suerte naapil sa Mythical Five.

Gumikan sa nagilak-gilak niyang rekord, ang 6-foot-3 wingman gikan sa Monkayo, Compostela Valley sa Davao de Oro gikuha sa Blackwater Elite isip No. 2 pick sa Gilas Pilipinas special draft nga kabahin sa 2019 PBA Rookie Draft niadtong Disyembre.

Gumikan niini, si Suerte uban nilang Isaac Go (Columbian Dyip), Matt Nieto (NLEX Road Warriors), Allyn Bulanadi (Alaska Aces) ug Mike Nieto (Rain or Shine Elasto Painters), mamahimong kabahin sa Gilas pool alang sa 2023 FIBA World Cup.

Samtang nanghinuklog sa mga panghitabo, ang 24-anyos nga si Suerte nagkanayon nga ang paghiabot niya sa pro league maoy katumanan sa iyang damgo sukad pa sa iyang pagkabata.

Apan sama sa nahitabo sa ubang katawhan, ang iyang mga plano nabaraw ning panahona tungod niining kalibutanong pandemiya.

"Naay gamay'ng kaguol about ani nga sitwasyon kay dili pa pwede mabalik ang basketbol kay higpit pa nga gipatuman ang social distancing, pero kailangan man gyud ta motuman sa balaod para makalikay ta ani nga pandemiya," matud pa ni Suerte. "Sayang, imbes nga mao na ni nga tuig nga akong gipaabot sa akong career kay sa kadugayan nakaabot na gyud tawon ko sa pro league."

"Pero sagdi lang, God has a purpose," dugang pa ni Suerte. "Unta mahuman na kini nga pandemiya aron mabalik na sa normal ang mga kinabuhi sa mga katawhan hilabina sa kadtong parehas namo nga kabos."