Laing world title fight nag-atang ni Jerusalem
CEBU, Philippines — Si Melvin 'El Gringo' Jerusalem sa ALA Gym nga hapit momantsa sa wa'y tatsang rekord ni Wanheng Menayothin sa ilang away tulo ka tuig na ang milabay, usa sa mga nakurat sa wala damhang pagretiro sa Thai ring legend.
Niadtong Domingo, si Menayothin mipahibawo pinaagi sa social media nga isab-it na niya ang iyang mga gloves sa hingpit uban ang impresibong 54-0 record. Gumikan niini, opisyal na niyang gibuak ang wa'y pidleng 50-0 career record ni Floyd Mayweather Jr.
"Nakalitan gyud ko sa iyang pagretiro kay gusto pa unta ko makig-rematch niya," matud pa ni Jerusalem.
Niadtong Enero 25, 2017 didto sa Phitsanulok Provincial Ground, hapit pildiha sa garbo sa Manolo Fortich, Bukidnon nga si Jerusalem si Menayothin nga nagdepensa sa iyang WBC minimumweight title.
Human sa 12 ka hugna nilang pinaksitay, si Jerusalem (15-2, 9KOs) gibuntog ni Menayothin sa sikit kaayong mga iskor, 114-113, 114-113, ug 115-113. Kon wala pa siya makuhai og usa ka punto ni reperi Celestino Ruiz tungod sa low blow sa ikawalong hugna, lahi unta ang resulta nga posible pang mopabor kaniya.
"Bisan og dili nami magka-away og usab, nagpasalamat gihapon ko niya kay gihatagan og niya og chance para makuha nako ako pangandoy nga ma-world champion," sumala pa ni Jerusalem.
Isip mga top contenders sa labing uwahing WBC rankings, sila Jerusalem ug ang Mehikanong si Daniel Valladares mao ang dunay katungod nga mag-ilog sa trono nga gibakantihan ni Menayothin.
Butang kana nga gilantaw sa unahan sa 26-anyos nga si Jerusalem uban ang tumang kahinam. is looking forward to.
"Paningkamutan nako ug buhaton nako tanan para makuha ning bakusa," pasalig pa ni Jerusalem. "Dili ko ni sayangan. Mao na ni akong gipaabot nga makaduwa og balik sa world championship."
- Latest
