CEBU, Philippines — Apil si Brooklyn Nets star Kyrie Irving sa pipila ka mga NBA players nga supak sa planong pagbalik sa aksiyon sa liga sunod bulan didto sa Orlando, Florida.
Segun sa taho sa ESPN ug The Athletic gamit ang wala nganling mga tinubdan, ang isyu sa 'racism' ug ingon sa kaluwasan ug panglawas taliwala ning pandemiya maoy usa nga gihisgutan sa dul-an 100 ka mga players sa usa ka conference call niadtong Sabado.
Matud pa ni Irving nga dili niya suportado ang pag-adto sa Orlando gumikan kay nakapanimaho siya og dili mao.
Kon ugaling madayon gyud ang pagtiwas sa NBA sa nahunong niining season, dili na hinuon makaduwa pa si Irving kay gioperahan man ang naangol niining abaga tulo ka bulan ang milabay.
Gawas ni Irving, sila si Joel Embiid, Carmelo Anthony, Donovan Mitchell, Kevin Durant, Chris Paul ug Dwight Howard gikataho nga miapil sab sa maong conference call.
Ang mga players nagkauyon nga kinahanglan silang mopresentar og usa ka hiniusang posisyon sa bisan unsang desisyon nga may kalambigitan sa buot mahitabo sa NBA nga buot ablihan og balik ang liga karong Hulyo 31 didto sa Disney Resorts sports complex sa Orlando.
Gipahimangnoan na hinuon ang mga players sa ilang mga ahente nga lagmit mawad-an sila og dili momenos
$1.2 billion sa ilang suweldo kon ugaling dili mahuman ang 2019-2020 NBA season.