Durant dili mag-debut sa Nets karong season

CEBU, Philippines — Namahayag si All-Star forward Kevin Durant  nga hanap na kaayo ang posibilidad nga moduwa siya sa labing unang higayon uban sa Brooklyn Nets ning naputol nga 2019-2020 NBA season.

Ang two-time Finals MVP wala na makaduwa pa human nakahiagum og injury atol sa Game-5 sa NBA Finals diin nagsul-ot pa siya sa uniporme sa Golden tate Warriors dul-an sa usa ka tuig na ang milabay.

Ang pagkasuspenso sa NBA sukad niadtong Marso 11 gumikan sa coronavirus pandemic nakahatag og igong panahon ni Durant aron makapaalim sa angol nga iyang gihambin.   

Si Durant nagkanayon nga nindot kaayo ang dagan sa iyang rehabilitasyon ug arang-arang na ang iyang pamati. Gani nag-training na siya og balik didto sa Los Angeles.

Miprangka hinuon si Durant nga segun sa pisikal niyang kondisyon sa pagka karon, dili pa siya andam nga mobalik og duwa niini nga season.

"It's just best for me to wait," matud pa ni Durant segun sa taho sa ESPN.

Tiwason sa NBA ang nahunong niining season karong Hulyo 31 (Agosto 1 dinhi sa Pilipinas) diin 22 ka teams na lang ang mahibilin apil na niini ang Nets.