Kon may gitanom may anihon: Pogoy
CEBU, Philippines — Mituo ang Sugboanong PBA star nga si RR Pogoy sa karaang panultihon nga kon ang usa ka tawo dunay gitanom, duna sab kini anihon.
Mismo si Pogoy ang ehemplo niini subay sa maanindot nga dagan sa iyang karera sa PBA.
Miangkon si Pogoy nga ang iyang mga sakripisyo sama sa pag-diet, disiplina ug doble kayod sa training maoy iyang taytayan nganong nagpabilin siyang usa sa mga sumusulbong nga bitoon karon sa liga.
Usa sa maayong gawi sa garbo sa mga Talisaynon mao ang sayo kaayo niining pagbutho sa ilang praktis.
Ang ilang ensayo gikatakda sa alas-9 sa buntag, apan si Pogoy nagkanayon nga alas-6:30 pa lang sa buntag atua na siya sa nag-workout sa ilang praktisanan.
Tuod man nagbunga ang paningkamot ni Pogoy. Ang 2017 Rookie of the Year nagkupot og mahinungdanong papel sa kampanya sa TNT KaTropa sa miaging PBA season diin sila nakaabot sa playoffs entiro season ug nakatikang pa sa Commissioner's Cup finals.
Sa labing mabungahon nga season sa iyang karera, si Pogoy mi-average og 18.3 points, 5.7 rebounds ug 1.6 assists matag duwa. Sa Governors' Cup mipatak siya og 20.2 points, 5.2 rebounds ug 1.9 assists.
Kining tanan giisip niyang bunga sa gitanom niyang kahago ug dedikasyon sa iyang karera.
"(Mas kumpiyansa ako kasi alam ko ini-ensayo ko ito araw-araw. Sa awa ng Diyos, gumanda ang laro ko," matud pa ni Pogoy. "May bunga talaga pag magtatanim ka."
- Latest
