Taulava nagpinsar sa iyang ugma

CEBU, Philippines — Gisugdan na sa pagtimbang-timbang ni Asi Taulava ang iyang mga opsiyon kabahin sa ugma sa iyang karera.

Si Taulava, ang labing tiguwang nga aktibong PBA player karon sa edad nga 47-anyos.

Ang higante sa NLEX nga mitaaak sa PBA niadtong 1999 unang nagparamdam nga siya moretiro na kon ugaling makadaog na og kampiyonato ang Road Warriors sa Philippine Cup.

Apan ang gibansagan nga "The Rock" nakaangkon pa og igong panahon nga magpinsar kabahin sa iyang ugma tungod sa pagkahunong sa PBA Season 45 gumikan sa pandemiya.

Matud pa ni Taulava nga sa wala pa magsugod ang nasuspenso nga season, naghuna-huna na siyang moretiro  kon ugaling maghari sila sa All-Filipino Cup.

Sa susamang higayon, si Taulava naghuna-huna sa pagpadayon og duwa gumikan kay kaya pa man sa iyang lawas ug labaw sa tanan wala pa mobahar ang iyang pagka-ungo sa basketbol.

Si Taulava, ang 2003 MVP nga dunay usa ka korona ug 17 ka higayon nga sakop sa All-Star, hapit na mamahimo nga labing unang player sa kasaysayan sa PBA nga nakaduwa sud sa upat ka managlahing dekada.

Iya kining makab-ot nga dungog kon makapakita siya'g aksiyon bisan kausa lamang sa NLEX kon magpadayon ang PBA season puhon.