CEBU, Philippines — Gipadayag ni Top Rank chairman Bob Arum nga ang kampo ni Manny Pacquiao mikontak kaniya kabahin sa posibilidad sa usa ka unification bout tali sa Pinoy ring star ug sa walay pildeng Amerikanong kampiyon nga si Terence Crawford.
Ang 40-anyos nga si Pacquiao maoy unified WBA welterweight champion, samtang si Crawford maoy nagkupot sa korona sa WBO. Nagsulti sa Top Rank podcast uban ni host Crystina Poncher, si Arum miingon nga usa kini ka nindot nga away nga plano niyang ipahigayon gawas sa Amerika, apan iya lamang kining lihukon kon ugaling mabalik na sa normal ang sitwasyon.
"Pacquiao and his people have reached out to me about the possibility of a Crawford fight," matud pa ni Arum nga maoy promoter ni Crawford, segun sa taho ni JJ Wrighter sa nowboxing.com.
"We were hopefully thinking about scheduling that fight outside of the United States. We’ll have to see, but it is certainly a very interesting fight and once this clears up, I think we have a way where it can happen," dugang pa sa beteranong promoter.
Gawas ni Crawford, duna pa'y laing mga dekalibreng welterweights nga nakalinya aron sunod kontrahon ni Pacquiao.
Si Keith Thurman naglantaw sa unahan sa usa ka "rematch", si Errol Spence buot nga harungon si Pacquiao sa iyang pagbalik, samtang si Amir Khan gustong tak-upon ang iyang karera pinaagi sa usa ka away batok sa bugtong eight-division world champion sa kasaysayan sa boksing.