Rodman midayeg ni Jordan
CEBU, Philippines — Gumikan sa 10 ka bahin nga serye sa dokumentaryo sa ESPN nga giulohan og "The Last Dance", nabuhi og balik ang bulawanong panag-uban nilang Michael Jordan, Scottie Pippen ug Dennis Rodman sul-ot ang uniporme sa Chicago Bulls sa NBA niadtong dekada '90.
Ang maong dokumentaryo nagtuki sa kampanya ni Jordan ug Chicago Bulls niadtong NBA 1997-1998 season diin sila naglaraw nga molangkat sa ikaunom nilang korona sud sa walo ka tuig.
Si Rodman nga unang nakauban si Jordan niadtong 1995 diin sila maoy kampiyon, dili ikalimod nga usa ka lig-ong haligi sa Bulls niadtong panahona. Taliwala sa iyang pagkabadlungon ug pagkainit sa ulo nga miresulta sa pagtawag kaniya nga 'Bad Boy' sa NBA, si Rodman napuno og pagdayeg sa labing sikat niyang teammate nga si Jordan.
"(Jordan) was a professional," matud pa ni Rodman sa libro nga “Facing Michael Jordan: Players Recall the Greatest Basketball Player Who Ever Lived".
Midugang si Rodman nga si Jordan lantip kaayo og pangisip isip usa ka magduduwa.
Sa mga mata ni Rodman, si Jordan kahibalo moguba og depensa ug ingon man mobasa sa opensa sa ilang kontra. Kahibalo kon kinsa iyang saligan sa kritikal nga sitwasyon ug labaw sa tanan kahibalo kon kanus-a motira sa labing gikinahanglan niyang itsa.
- Latest
