CEBU, Philippines — Gipadayag ni San Miguel Beermen superstar June Mar Fajardo nga nindot ang iyang pagrekober gikan sa injury nga iyang nahiaguman duha ka bulan ang milabay ug gani misaad kini nga mobalik siya nga mas kusgan.
Ang higanteng Sugboanon nga gikan sa lungsod sa Pinamungajan sa habagatang bahin sa Sugbo gioperahan niadtong Pebrero aron ayuhon ang nabali nga bukog sa ubos nga bahin sa tuo niyang tuhod.
Gumikan niini, si Fajardo nanginahanglan og taas-taas nga panahon alang sa iyang rehabilitasyon aron makarekober sa hingpit.
"Okay naman. Ngayon nakakalakad na ako. Siguro nasa 70, 80 percent na ng weight ko pwede kong ilagay sa paa ko," matud pa ni Fajardo sa dihang mi-guest siya sa 2OT podcast nilang Carlo Pamintuan ug Magoo Marjon.
"Ayun, siguro baka next month, makakalakad na ako nang walang crutches, walang walker," dugang pa sa labing una ug bugtong nga six-time PBA Most Valuable Player.
Ang San Miguel mihatag sa 6-foot-6 nga sentro sa tanang oras nga gikinahanglan niini aron mabalik ang kapiskay sa iyang panglawas.
"Gagawin ko ang lahat para maganda ang recovery ko. Sa ngayon, iniisip ko kung paano lumakas uli, gumaling ang injury ko, proper healing," sumala pa ni Fajardo.