CEBU, Philippines — Si Vergel Meneses, ang PBA great nga nagsilbe karong mayor sa Bulakan, Bulacan, maoy tunolan sa President's Award sa PBA Press Corps sa umaabot niining annual awards night.
Ang bugtong 'Aerial Voyager' sa Philippine basketball magsilbe sab nga pinasidunggang dinapit ug mamulong sa maong kalihukan nga natayming sa ika-25 nga anibersaryo sukad siya gibayaw nga MVP sa PBA uban sa Sunkist niadtong 1995.
Duha ka higayon nga Mythical First Team member ug katulo nahimong Best Player of the Conference, si Meneses maoy ikaduhang personalidad nga makadawat sa maong award sukad kini gihatag sa labing unang higayon sa tibuok PBA Board ubos sa pagpangu ni Ricky Vargas niadtong 2018.
Unang nakakuha og atensiyon sa publiko si Meneses sa dihang 18- anyos pa siya nga forward sa Jose Rizal College, iyang gipilde ang mga establisado nang daan nga amateur stars nga sila si Jojo Lastimosa, Alvin Patrimonio, Bong Alvarez ug Nelson Asaytono aron dominahon ang Slam Dunk contest niadtong 1987 PABL Freedom Cup.
Sa dihang nahimo siyang pro niadtong 1992, gibunlot siyang No.1 overall pick sa Presto sa PBA Draft. Sunod niini, nakaduwa siya kadiyot sa Sta. Lucia.
Apan ang pagbalhin niya sa Swift/Sunkist maoy nagtuboy ni Meneses aron mamahimong usa ka superstar. Nahimo siyang franchise player sa Sunkist nga nakadaog og tulo ka kampiyonato.
Ang two-time slam dunk champion ug four-time All-Star MVP nakaduwa sab sa Barangay Ginebra, FedEx, Red Bull ug Talk 'N Text sa naghinapos nga bahin sa iyang karera. Ang No. 18 niyang jersey giretiro sa Air21 Express niadtong 2013. Sud sa 590 ka duwa sa mabulukon niyang karera, si Meneses mi-average og 16.0 points, 3.2 rebounds, ug 3.6 assists.