Ranidel de Ocampo bukas sa posibilidad nga mag-coach
CEBU, Philippines — Bisan miretiro na, basketbol gihapon ang prayoridad ni Ranidel De Ocampo.
Dili pa man tuod siya segurado nga mag-coach, apan si De Ocampo bukas sa maong ideya ilabi kon dunay team nga motanyag kaniya nga mahimong sakop sa ilang coaching staff.
"Sa ngayon hindi ko pa masabi, pero kung may gustong isali ako sa staff nila, puwede namang i-consider," matud pa sa 38-anyos nga si De Ocampo segun sa taho sa PBA.ph.
Gumikan sa nagkadaiyang injury nga mihamok kaniya sa miaging duha ka tuig, si De Campo mipahibalo nga moretiro na siya sa pro basketball niadtong Lunes.
Sud sa 15 niya ka seasons sa PBA uban sa FedEx, Talk 'N Text ug Meralco, si De Ocampo mo-average og 12.0 points, 6.0 rebounds ug 2.0 assists matag duwa.
Nakadaog siya og unom ka kampiyonato, naapil sa Mythical First Team tulo ka higayon, nahimong Finals MVP ug Best Player of the Conference kaduha ug naapil sa All-Star siyam ka higayon.
Si RDO nahimo sab nga pambato sa Gilas Pilipinas ug natatak sa huna-huna sa mga Pinoy human siya milansang og krusyal nga tres nga maoy nagsilyo sa 86-79 nga kadaogan sa Pilipinas batok sa South Korea sa semifinals niadtong 2013 FIBA Asia Men's Championship.
Ang maong daog maoy nakahatag og luna sa Pilipinas sa 2014 FIBA World Cup sa labing unang higayon sud sa 36 ka tuig.
- Latest
