Madelatar pagbayaw nilang Hopkins, Mosley'

CEBU, Philippines — Malangan pa ang pagbayaw nilang legendary world champions Bernard Hopkins ug 'Sugar' Shane Mosley ngadto sa International Boxing Hall of Fame gumikan sa coronavirus pandemic.

Ang duha ka banggiitang boksidor gikatakda untang tunolan sa maong prestihosoyong pasidungog karong Hunyo 11-14 sa usa ka bonggang seremonyas didto sa  Canastota, New York.

Apan ang maong kalihukan giuswag ngadto sa Hunyo 10-13 sunod tuig gumikan kay ang binyu nga gamiton temporaryo mang sirado gumikan ning virus outbreak.

Si Hopkins nga dunay 55-8-2 record uban ang 32KOs, naghari isip undisputed middleweight champion sud sa 10 ka tuig gikan niadtong 1995 ngadto sa 2005.

Nahimo siyang labing tiguwang nga kampiyon sa kasaysayan sa boksing ubos sa light heavweight division nga natapos sa edad nga 49 niadtong 2014. Sa iyang bahin, si Mosley nga dunay 49-10-1 record uban ang 41KOs, kanhi  world   champion sa lightweight, welterweight ug light middleweight division.