Gobert nangayo'g pasaylo
CEBU, Philippines — Si Utah Jazz big man Rudy Gobert nangayo og pasaylo human siya nag-positibo sa bagsik nga coronavirus nga nanghasi karon sa tibuok kalibotan.
Miangkon si Gobert nga nagdanghag siya ug dili makiangayon ang iyang gibuhat nga lagmit miresulta ngadto sa pagkatakod niya sa maong sakit sa ubang mga tawo.
Kahinumduman, nga niadtong Martes atol sa usa ka press conference, si Gobert nagbugal-bugal pinaagi sa paghikap sa tanang mikropono ug tape recorded sa press room ug ingon man nanghilabot sa butang sa iyang mga teammates sa ilang locker room.
Duha ka adlaw ang milabay, si Gobert nag-positibo sa COVID-19 nga maoy nakapugos sa NBA pagsuspenso sa nagpadayon niining season.
"The first and most important thing is I would like to publicly apologize to the people I may have endangered," suwat pa ni Gobert sa iyang Instagram. "At the time, I had no idea I was even infected. I was careless and make no excuse."
Ang nakapait kay ang teammate ni Gobert nga si Donovan Mitchell nagpasitibo sab sa gikahadlokang virus kagahapon.
Nanghinaut si Gobert nga pinaagi sa iyang estorya makat-on og leksiyon ang tanan taliwala ning makuyaw nga krisis.
"I hope my story serves as a warning and cause everyone to take this seriously," dugang pa niya.
- Latest
