CEBU, Philippines — Kasado na ang ika-27 nga edisyon sa Sunsport Basketball Training Camp karong Abril diha sa Sacred Heart Center Sports Club sa may dalan D. Jakosalem, Cebu City.
Matud pa ni Sunsport chief trainer/coach Jojo Romarate Teves nga ang Level 1 sa labing dugay ug organisado nga basketball clinic sa Sugbo gikatakda karong Abril 6-30, samtang ang Level 2 ipahigayon sa Mayo 4-29.
Nagkanayon si Teves nga ilang tudloan ang ilang mga estudyante sa saktong pamaagi sa pagdribol, pagpasa ug pag-itsa ingon man footwork ug nagkadaiyang estratehiya sa depensa.
Ang training sessions ipahigayon Lunes ngadto sa Biyernes, gikan sa alas-8 hangtod sa alas-10 sa buntag alang sa mga entrante nga nag-edad og siyete ngadto sa 11-anyos ug gikan sa alas-10 sa buntag ngadto sa alas-12 sa udto niadtong nag-edad og 12 ngadto sa 19-anyos.
Ang registration nagkantidad og P1,500, apil na ang Sunsport basketball 2020 edition, jersey, shoe bag ug t-shirt. Mahimong mobisita sa www.sunsportball.com aron i-download ang registration form.
Alang sa dugang impormasyon, kadtong mga interesado mahimong mokontak ni coach Jojo sa 0922-5233968/0966-2690167 o sa buhatan sa Sunsport sa (032)-3451015.