Talisay gipatilaw og pilde ang Minglanilla sa Gullas Cup

CEBU, Philippines – Si Keaton Taburnal mitagak og 28 puntos sa dihang gipatilaw sa Talisay City Aquastars og pilde ang Minglanilla Archangels sa labing unang higayon, 89-83 sa Gullas Cup: Vision 2020 Cebu  First  District Under 21 Basketball Tournament didto sa Bonifacio Bacaltos Sports Centrum sa Sibonga.

Midugang si Clark Ruedas og 19 puntos, samtang si Jhaylord Castro nagmangtas sab uban ang 16 puntos sa Aquastars nga milusad og nagbagang ataki sa naghinapos nga bahin sa duwa aron patikyaubon ang Archangels.

Alkansi og sayes puntos human sa tulo ka kuwarter, 60-66, ang Aquastars midagkot og nagkayong 29-17 rally sa katapusang 10 minutos sa aksiyon nga maoy nahimo nilang taytayan sa kalampusan.

Dako sab og naambag si Rubino Singson nga mihipos og 11 puntos alang sa Aquastars nga nakapuwersa og three-way tie sa liderato uban ang Archangels ug Carcar City Lechoneros bitbit ang managsamang 3-1 win-loss records.

Ang Carcar mikadlit sa ikatulo nilang daog human gipawong ang Naga City Electrifiers, 69-62.

Si Jumar Bucao maoy  nangu sa Lechoneros uban ang 12 puntos, gisundan ni Jhevolks Navarra nga dunay 10 puntos.

Sa laing bahin, wala pakyasa sa Sibonga Pillars ang ilang mga dumadapig didto sa ilang korte human ilang gipaksit ang San Fernando Spartans, 78-73  aron tablahon ang ilang baraha ngadto sa 2-2. Ang San Fernando nadakin-as ngadto sa 1-3, samtang ang Naga wala pa'y daog  sa upat ka duwa.

Si John Sonsona maoy bida sa Sibonga uban ang 19 puntos. Misalida sab si Emman Suarez bitbit ang 17 puntos.  Si Frederick Rosales maoy laing double-digit scorer sa Pillars sa iyang 10 puntos.