CEBU, Philippines – Misaad si San Miguel Beermen veteran forward Arwind Santos nga magbinut-an ug dili na magpabadlong sa sunod season sa PBA.
Si Santos nga gipahamtangan og 'indefinite suspension' sa PBA niadtong Nobiyembre, miapil na sa team practice sa Beermen, apan wala pa mihatag og pagtugot ang PBA nga makabalik na siya sa korte.
Si Santos uban ang duha ka teammates nga sila si Kelly Nabong ug Ronald Tubid gisuspenso human magrambol atol sa team practice sa koponan.
Gawas niini, si Santos gipamulta na usab og P200,000 sa miaging Commissioner's Cup human niya gitawag nga unggoy ang import sa TNT KaTropa nga si Terrence Jones.
"Kaya ito, natuto ako at nangako ako rin na hindi na 'ko gagawa ng kahit anong mga trouble dito," matud ni Santos sa Spin.ph. "Yung mga negative, gawin mong challenge dahil isa yun sa pwedeng mag-push sa 'yo para mag-prepare ka nang husto, and para abutin ‘yun goal mo."
Nagpasalamat hinuon si Santos sa mga kadagkoan sa San Miguel kay gipasaylo siya. Gusto niya nga suklian kini og kakugi sa team practice ilabi na nga ang San Miguel ang defending champion sa All-Filipino Cup nga buksan sa sunod bulan.