Davis mibasura tanyag sa Lakers

CEBU, Philippines – Si Anthony Davis mamahimong usa ka unrestricted free agent karong summer.

Mao kini ang senaryo nga nag-atang ni Davis sa unahan human iyang gibaliran ang upat ka tuig nga maximum contract extension nga gitanyag kaniya sa Los Angeles Lakers dili pa lamang dugay.

Matud pa ni Chris Haynes sa Yahoo Sports, nga si Davis duna pa'y $28.7 million nga opsiyon alang sa 2020-2021 season.

Nagkanayon si Haynes nga gituyo ni Davis ang maong lakang gumikan kay gusto niining makapokus sa iyang kampanya ning kasamtangang NBA season.

Nagtuo hinuon si Haynes nga bisan og usa na ka free agent, dili mahitabo nga biyaan dayon ni Davis ang Lakers.

Si Davis mipatak og average nga 27.7 points, 9.5 rebounds, 2.6 blocks ug 1.5 steals matag duwa alang sa Lakers nga mao karon ang numero unong team sa Western Conference.