Harrell, George, Williams mihimo og kasaysayan

CEBU, Philippines —  Miposa og 34 puntos si  Montrezl Harrell  aron pangulohan ang tulo ka players sa Los Angeles Clippers nga mipuntos og dili momenos 30 atol sa ilang kadaogan batok sa New York Knicks kagahapon sa nagpadayon nga duwa sa National Basketball.

Sila si Paul George ug Lou Williams mikadlit og 32 puntos matag usa sa  Clippers nga nakaipsot batok sa New York Knicks, 135-132.

Mao sab kadto ang labing unang higayon sa 50 ka tuig nga kasaysayan sa Clippers nga tulo ka players ang mitali og kapin sa 30 puntos sa usa ka duwa.

Malipayon hinuon si Rivers gumikan kay ang Clippers nakabawi human malubong og 16 puntos sa unang kuwarter. Sila si Williams ug Harrell nagkumbinar og 32 puntos sa nagpungasi nga rally sa ikaduhang kuwarter nga maoy nakapalabaw sa Clippers og siyete puntos sa halftime, 76-69.

Gipaburot pa sa Clippers ang ilang labaw ngadto sa 11 puntos sa nahibiling 7:06 sa duwa ug igo lamang nakasikit ang Knicks ngadto sa tres puntos sa katapusang 10.4 segundos.