Kyocera abante sa EVO League finals
CEBU, Philippines — Ang Kyocera Frontiers nag-agi usa og overtime sa wala pa buntoga ang Dynata Warriors, 68-66, sa tinagakay nilang duwa aron pagmartsa ngadto sa EVO League finals sa Tanduay Athletics CSCC E-Leagues for Basketball Season 15 niadtong Sabado didto sa City Sports Club-Cebu gym.
Gumikan sa ilang kadaogan, ang Kyocera maoy naka-angkon sa katungod nga makigharong sa Contact Solutions Flying Lemurs sa kampiyonato nga usa ka best-of-three series.
Si Matthew Grafilo mipabuto og 35 puntos uban ang lima ka rebounds, duha ka assists ug usa ka steal alang sa Frontiers nga maanindot kaayong mibalitok human nasugamak sa Game 2, 49-80.
Wala hinoon makapakitag aksiyon si Ariel Edera niatong higayona.
Sa iyang pagbalik, si Edera mikuha og atensiyon uban ang 19 puntos, 11 ka rebounds, lima ka assists, upat ka steals ug tulo ka blocks.
Sa deciding Game 3, ang Dynata naglabaw og singko puntos human sa tulo ka kuwarter, 51-46, apan ang Kyocera mibanat og maayo dayon na pag-eskapo niini ngadto sa dos puntos nga kadaoghan.
Sila si Tommy Ugsimar ug Karl Rubica parehong mikadlit og double-double apan nakawang ang maanindot nilang salida sa habig sa Dynata.
Si Ugsimar mitapos uban ang 18 puntos, 11 ka rebounds, tulo ka assists ug usa ka steal samtang si Rubica mitali og 11 puntos, 11 ka rebounds, usa ka assists ug usa ka block sa pilderong kawsa.
- Latest
