CEBU, Philippines — Wala pa mahuman ang 30th Southeast Asian, apan mamahimo na nga ideklarar isip bag-ong overall champion ang Team Phl human sa dominanteng gipakita sa ilang mga atleta.
Gawas nga nakuha pagbalik sa nasud ang kinatibuk-ang kampiyonato, gitukod sab sa nasud ang labing nindot nilang medal performance sa kasaysayan sa maong multi-sporting event nga himuon matag duwa ka tuig.
Ang Pilipinas milapas na sa target nga 100 gold medals.
Sa pagsulat ning balita, ang Pilipinas aduna na'y 118 ka bulawang medalya.
Nabuak usab nila ang rekord kaniadto sa labing daghan nilang gold medal nga nakuha nga 113 niadtong tuig 2005 diin ang mga Pinoy usab ang naghari.
Aduna pa'y kapin 20 ka gold medals ang nahibilin sa SEA Games, apan segurado na ang Pilipinas bisan wala na kini madag-an.
Nagsunod sa Pilipinas ang Vietnam nga adunay 68 ka golds.
Misidlak ang mga Pinoy sa hapit tanang natad sa sports, apan mas mipabilib ang mga bag-ong record holders.
Kini naglakip sa Fil-foreign sprinter nga si Kristina Knotts nga mihimo og bag-ong record time sa 200m run nga 23.01. Iyang nalabwan ang national record ni Pinay legend Lydia De Vega nga adunay 23.50.
Ang world champion nga si Ernest Obiena mihimo usab og bag-ong record sa pole vault nga 5.45 meter. Gipapas niya ang record sa Thai nga si Porranot Purahong nga adunay 5.35.
Sa ilang bahin, ang men's volleyball team mihimo og kasaysayan human nila gipalagpot ang defending champion Thailand sa kulbahinam nga duwa nga milanat ngadto sa lima ka sets. Una kining higayon nga ang Phl men's volleyball team misud sa finals human sa 40 ka tuig.