Tabal Napakyas
CEBU, Philippines — Mihimo og dakong kasikas si Christine Hallasgo dihang iyang gipilde ang Olympian nga si Mary Joy Tabal alang sa gold medal sa women's marathon sa 30th Southeast Asian Games kagahapon didto sa Capas, Tarlac.
Usa ka surprisa ang resulta sa lumba kay gituohan sa kadaghanan nga makuha ni Tabal ang ikaduha niyang sunod-sunod nga SEA Games gold medal, apan napakyas kini. Ang mas maka-pakurat pa kay ang usa ka Pinay nga mipilde kaniya dili ilado.
Sa maong lumba, si Tabal nga nag-ensayo didto sa Japan sud sa tulo ka bulan, maoy nag-una pagsugod, apan migukod si Hallasgo sa tunga-tungang bahin ug mibulhot sa katapusang lima ka kilometro aron maapsan si Tabal.
Si Hallasgo milatas sa finish line sud sa duha ka oras, 56 minutos ug 56 segundos, samtang si Tabal adunay oras nga 2:58:39. Si Hong Le Thi sa Vietnam mioras og 3:02:52 alang sa bronze medal.
"Wala akong inisip na matatalo ko si Tabal inisip ko lang na maka-medal para sa bansa," matud ni Hallasgo nga taga-Malaybalay, Bukidnon sa Mindanao.
Ang kapildihan ni Tabal posibleng makaapekto sa iyang tsansa nga mosud sa 2020 Tokyo Olympics isip pambato sa nasud.
Naglisud si Tabal paghuman sa 42-kilometros nga lumba dihang nahagba siya dili layo gikan sa iyang paglabang sa finish line ug gitabang sa mga medic. Nakarekober ra hinuon si Tabal ug iya pang gidayeg si Hallasgo.
"Exhausted na gyud ko. But I'm okay. Happy ako kasi nag first si Christine. I'm so proud of her. We win as one nga!" matud pa ni Tabal.
- Latest
