Cobras mobanat na sa kibawe
CEBU, Philippines — Ang bag-ong kampiyon sa Cebu Schools Athletic Foundation, Inc. (CESAFI) Southwestern University (SWU)-Phinma Cobras mosugod na sa ilang kampanya batok sa LGU Damulog/Mayor Mel Buro sa 1st Kibawe Mayor's Cup Open Basketball Tournament karong adlawa didto sa Kibawe, Bukidnon.
Gipaluyohan sa LGU Kibawe ubos sa liderato ni mayor Reynaldo 'Jimboy Tebontu' S. Ang Rabanes, ang lima ka adlaw nga torneyo nga modalit og P275,000 nga ganti sa mga mananaog seguradong makalingaw ug makahupay sa gibati nga kabalaka sa mga Kibawehanons nga gitay-og og linog dili pa lamang dugay.
Sangkaon sa LGU Maramag/SWU-Phinma Cobras ni coach Mike Reyes ang LGU Damulog sa alas-6 sa gabii sa dili hamagon sa JT Gamolo Construction/Hotel de Susana-Pasig Sta. Lucia Realtors ang LGU Dangcagan-Cagayan de Oro City selection sa main game sa alas-8 sa gabii.
Ang Cobras moparada sa tibuok nilang line-up nga mipakugang sa three-time defending champion University of the Visayas (UV) Green Lancers aron sakmiton ang una nilang CESAFI title sud sa lima ka tuig tulo pa ka semana ang milabay.
Ubos sa pagpangu ni MVP Sir Shaquille Imperial ug Senegalese import Lamine Thiam, ang Cobras makalaum sab sa kalibre nilang William Polican, Red Cachuela, Dyll Roncal, Harvey Kent Sanchez, Gerald Fernandez, Rhey Ian Boc, Heider Bilao, Louie Nazareno, Ramish Alforque, John Evardo, Throy Cabahug, King Cabansay ug Kenneth Macasarte.
Sa laing bahin, ang XY Builders-Tagoloan Community College (TCC) Cagers mosugod sa ilang salida ugma batok sa LGU Dangcagan.
Ang lima ka teams moduwa og single round robin diin ang top 2 maoy mag-ilog sa titulo sa usa ka knockout match
Ang makampiyon mobulsa og P100,000, samtang ang mopahiluna sa ikaduha ngadto sa ikalimang dapit makadawat og P70,000, P50,000, P30,000 ug P25,000.
- Latest
