Webmasters, Magis Eagles naglaraw luna sa finals

CEBU, Philippines – Ang University of Cebu (UC) Webmasters ug ang Sacred Heart School-Ateneo de Cebu (SHS-AdC) Magis Eagles parehong naglaraw og luna sa finals sa ilang pakigsangka batok sa managlahing kontra sa semifinals sa 19th Cebu Schools Athletic Foundation, Inc, (CESAFI) men's basketball tournament karong adlawa diha sa Cebu Coliseum.

Unang motikang sa korte ang second seed Magis Eagles batok sa third-ranked University of the Visayas Baby Lancers sa alas-5:15 sa hapon ug  dayon ang No. 2 qualifier Webmasters batok sa three-time defending champion UV Lancers sa alas 6:45 sa gabii.

Ang Webmasters nakaangkon og dungog isip bugtong team nga naka-sweep sa Lancers sa duha ka hugna nga eliminasyon. Nakatabang kini og dako sa mga batos ni coach Yayoy Alcoseba pag-angkon og twice-to-beat advantage batok sa gikaintapan nilang kaatbang.

Wala hinuon kaayo huna-huna ni Alcoseba ang duha ka duwa nilang pagpayaka sa Lancers gumikan kay alang kaniya matag duwa usa ka dakong hagit batok sa tadhang team nga midonar sa liga sa miaging tulo ka tuig.

Sa iyang bahin, si UV coach Gary Cortes nagkanayon nga ila lamang ihatag ang tanan kutob sa ilang mahimo ilabi na ning higayona nga wala na'y ugma nga nagpaabot alang kanila kon ugaling sila maparot.

"It's okay that we got swept by the Webmasters because it's only the eliminations," matud pa ni Cortes nga naglaraw sa ikalima niyang sagunson nga pagtaak sa finals sukad siya na-coach sa UV niadtong 2015.

Sa juniors division, ang Magis Eagles mosuway pagpahimus sa ilang twice-to-beat incentives batok sa Baby Lancers.

Napilde ang Magis Eagles sa Baby Lancers sa ilang season-opener, apan midaog sila kawalo sa sunod nilang siyam ka duwa hinungdan nga sila maoy milabni sa No. 2 spot sunod sa topseed nga UC Baby Webmasters.