Heat mipahagsa sa nasaag nga Rockets

CEBU, Philippines —  Si Duncan Robinson miiskor og 23 puntos, samtang si Meyers Leonard mipuno og 21 puntos sa dihang gipakaging sa Miami Heat ang bisitang Houston Rockets, 129-100 sa NBA kagahapon.

Dominado kaayo sa nagmangtas nga Heat ang duwa diin sa usa ka higayon naglabaw sila og 41 puntos.

Mikuha sab og atensiyon si Jimmy Butler nga mikadlit og 18 puntos ug siyam ka assists ug ingon man si James Johnson mga mikamada og  17 puntos alang sa Heat nga miinat sa ilang rekord ngadto sa 5-1.

Si James Harden miwadwad uban ang 29 puntos alang sa Rockets, apan ang iyang sidekick nga si Russell Westbrook naangklahan ngadto lamang sa 10 puntos.

Gawas sa eksplosibo nilang opensa, gilupig sab sa Heat ang Rockets sa assists, 38-19.

Ang Heat mirehistro sa ikatulong labing dako nga labaw human sa unang kuwarter sa kasaysayan sa NBA sa dihang ilang gilubong og 32 puntos ang Rockets sa iskor nga  46-14.

Wala pa makuntento niini ang Heat gumikan kay ila pang gipaburot ang ilang labaw ngadto sa 41 puntos, 59-18 sa nahibiling kuwatro minutos sa ikaduhang kuwarter. Wala na makabangon pa sukad niadto ang Rockets nga igo lamang mikitkit sa labaw ngadto sa 25 puntos atol sa halftime.

Dako sab og natabang sa Heat sila si Goran Dragic ug Tyler Herro nga nagkumbinar og 27 puntos.