Sirlitz basketball camp mosikad Marso 31

CEBU, Philippines – Han-ay na ang tanan alang sa ika-18 nga edisyon sa Sirlitz One-On-One Training Camp,  usa sa labing karaan ug gisaligan nga summer basketball clinic sa Sugbo. 

Sugdan kini karong Marso 31 diha sa Barangay San Vicente gym sa lungsod sa Lilo-an.

Abli sa mga batan-ong basketbolista nga nag-edad og 18-anyos paubos, ang training session ipahigayon gikan sa alas-8 sa buntag hangtod sa alas-12 sa udto kun duha ka oras matag age-group gikan sa Lunes hangtod Sabado.

Mopadagan sa usa ka bulan nga summer clinic mao si Sirlitz training director Edsel Say Vallena, nga bag-o  pang gitudlo nga head coach sa Cebu Institute of Technology-University (CIT-U) Wildcats sa Cebu Schools Athletic Foundation, Inc. (CESAFI).

Si Vallena nga hanas sa US ug Korean nga estilo sa pagduwa og basketbol, nagkanayon nga gawas nga bansayon ang ilang mga estudyante  sa saktong pamaagi sa pagdribol, pag-itsa, pagpasa ug footwork, ila sab kini nga tudloan og team ug individual defense ug ingon man one-on-one offensive drills.

"Naabot mi ingon ani kadugay kay gisaligan mi tungod sa dekalidad nga training nga among ihatag sa mga bata. Segurado gyud nga molambo ang ilang abilidad kun moapil sila sa among camp,"  matud pa ni Vallena.

Mapasigarbuhon kaayo ang Sirlitz camp ni kanhi UAAP star Paul Desiderio sa University of the Philippines (UP) Fighting Maroons nga nagduwa na karon uban sa Blackwater Elite sa PBA isip usa sa labing masanagon niining produkto.

Ang rehistrasyon naglangkob og reversible jersey. Alang sa dugang mga impormasyon, kadtong mga interesado mahimong motawag sa telepono 0906-4683775 o 0943-6068834.